Mención nel Concursu de microrrellatos mineros Manuel Nevado Madrid

Nun pudi tar esti xueves na llectura de los rellatos que premiaron nel Concursu de microrrellatos mineros Manuel Nevado Madrid. Gracies al xuráu y la Fundación Juan Muñiz Zapico pola mención especial pal mio rellatu “El silenciu de la mina”, que podéis lleer yá na web de la Fundación.
 
Préstame abondo saber que los ganadores d’esta edición foron Pablo Rodríguez Medina, en castellán, y Aique Iglesias na categoría d’asturianu, amás d’otres menciones a Valentín Moro y Armando Gutiérrez poles sos obres n’asturianu. ¡Norabona a toos!

Conferencia: La situación del asturianu nel Franquismu

CLUB LA NUEVA ESPAÑA DE XIXÓN
Sala Cultural Cajastur “Monte de Piedad”
Plaza del Monte de Piedá 2, Xixón
Xueves 1 d’avientu de 2016 a les 20 hores.
“La situación del asturianu nel Franquismu. Una llingua minorizada nel marcu d’un réxime totalitariu y centralista”, a cargu d’Inaciu Galán y González. 
Ta previsto que na charra s’amuesen delles idees alredor de la situación que vivió l’asturianu na so convivencia col castellán nes distintes etapes del franquismu. Dende les prohibiciones que vivieron toles llingües distintes del castellán, y cómo esto influyó a la llingua asturiana, hasta les discusiones internes ente partidarios y detractores del asturianu del propiu réxime franquista. Inaciu Galán ye profesor, escritor, graduáu en Periodismu y máster en Sociedá de la Información y el Comocimientu, y aguaño prepara la so tesis doctoral sobre la llingua asturiana nel Franquismu.
Entrada llibre y de baldre.

Discursos llingüísticos na lliteratura asturiana del Franquismu

Mañana compartiré dellos avances de la mio tesis con una comunicación titulada “Discursos llingüísticos na lliteratura asturiana del Franquismu”. Va ser a les 17:30 na Facultá d’Humanidaes de la Universidá d’Uviéu, dientro de les XXXV Xornaes Internacionales d’Estudiu de l’Academia de la Llingua Asturiana, qu’esti añu tán dedicaes a la lliteratura con un programa bien interesante, cola participación d’espertos en lliteratura como Marta Mori de Arriba, Esther Prieto, Vicente García Oliva, Antón García, Alberto Gómez, Pablo Rodríguez Medina, Carlos Alba Cellero, Antón Caamaño o Berta Piñán. 

Programa completu

Décimu aniversariu de la revista lliteraria Formientu, en Xixón

decimu-aniversariu-formientu

Esti xueves 27 d’ochobre vamos celebrar el décimu aniversariu de la revista Formientu. Esta fecha tan especial queremos abrila a tolos collaboradores de la revista a la llargo de los caberos diez años, pa que participéis con testos propios interviniendo nel actu.

La escritora Vanessa Gutiérrez, que nel so día tamién apaeció nes páxines de la revista, sedrá la encargada de presentar l’eventu que va siguir cola llectura de testos nuna timba poética na que toos y toes podéis participar.

La presentación entamará a les 19:00 en Toma3 (Xixón). Cai Marqués de Casa Valdés, 27. 

Preséntase na FNAC “Tierra podre”, el primer poemariu d’Inaciu Galán

Esti vienres 30 de setiembre a les 19 hores na FNAC d’Intu Asturies, en Siero, va presentase’l poemariu “Tierra podre”, del periodista y escritor Inaciu Galán. Na presentación tará presente’l tamién l’editor, Pablo Solares. La obra edítala Ediciones Camelot y ta yá la venta nes principales llibreríes d’Asturies. 

Tierra Podre ye un poemariu dixebráu en seis estayes temátiques qu’encadarmen el llibru y organicen los poemes acordies con temes que s’enrriestren dándo-y un filu de continuidá. El poemariu percuerre los requexos de la memoria familiar, les obsesiones vitales venceyaes a espacios físicos y a les distintes realizaciones de la lluz. Amás, toca temes venceyaos a la muerte, les despidíes o la vuelta al pasáu, xunto a otros poemes más identitarios que mos tresporten a paisaxes o falen del sentimientu de pertenencia a la tierra. Hai tamién espaciu pa pieces poétiques que s’averen al erotismu, a lo efímero de la vida o a la fraxilidá de les vivencies y les alcordances.
Inaciu Galán y González (Xixón, 1986) ye periodista, profesor, xestor cultural y activista en defensa de los drechos llingüísticos, al frente d’Iniciativa pol Asturianu dende l’añu 2011. Nel ámbitu lliterariu apaez en volúmenes colectivos y vien collaborando con revistes como Lliteratura, Reciella Malory, Lletres Lliterariu, La Ratonera, asina como con artículos d’investigación alredor de la lliteratura y la llingua asturianes en revistes y volúmenes colectivos de calter científicu. Amás, fíxose con premios nel campu de la narrativa curtia, el monólogu, la poesía, la investigación y el periodismu, incluyendo’l Premiu Urogallo de Bronce pol so llabor a favor del asturianu y el pasáu mes d’agostu, col prestixosu Premiu Fernán Coronas de poesía. En 2006 fundó la revista lliteraria Formientu, que dirixe dende entós y que vien asoleyando la obra de más d’un cientu d’autores mozos asturianos, convirtiéndose nesta década d’actividá na cantera de la lliteratura n’asturianu. Autor d’obres como’l Diccionariu asturianu-inglés/inglés-asturianu (Trabe, 2006), primeru billingüe d’esti idioma con otra llingua distinta al castellán, o’l llibru infantil Nel, el coríu que nun sabía nalar (Asturtoons, 2012), ente otros, presenta agora, más de diez años dempués d’entamar la so actividá poética, el so primer poemariu individual.